full screen background image

أشك فى كل من حولى

اشك في كل من حولي

الاسم / نور
السن / ٢٥ سنة

أستاذة إيمان تسمحيلي أتكلم مع سيادتك شوية رغم إني شاكك إنك هاتردي عليا أصلاً وهي دي مشكلتي بإختصار، الشك في كل حاجة، في كل اللي حواليا، اتربيت علي كدة أمي أبويا سابها وأنا عندي ٣ سنين واتجوز من صاحبتها ومن وقتها أمي بتشك في صوابع إيديها وربتني علي إني أشك حتي في أقرب الناس ليا وعلمتني إن اللي بيقرب مني أكيد عايز مني حاجة وبعدها هايسيبني حتي البنت الوحيدة اللي حبيتها أمي فضلت تكرهني فيها وتحسسني إني لو اتجوزتها هاتهرب مع واحد من أصحابي، حتي أصحابي لو حد عمل لي أي خدمة أو معروف بدلاً من أن أشكره ألاقيني أقوله هات من الآخر عايز مني إيه في المقابل،
ومما زود المشكلة عندي إني فعلاً بأجد أحياناً إن أمي معها حق حتي الأفلام والمسلسلات اللي بنشوفها بتقول كدة

بس أنا تعبت نفسي أحس بالأمان والثقة في الناس، نفسي أصدق إن مش كل الناس خاينة ووحشة بس مش عارف خايف قوي الأقي نفسي في يوم من الأيام وحيد مافيش أي حد جنبي لأني تقريبا طفشت كل اللي بيحبوني ومش عارف أعمل إيه
أرجوكي ساعديني إني أستعيد ثقتي في الناس رغم إني متأكد إنك مش هاتسألي فية أو حتي تردي علية
وفي النهاية أشكرك ده لو رديتي

 


 

الرد

أهلاً بك يا نور واديني يا سيدي بأرد عليك وهانشر رسالتك كمان، شوف يا نور الست والدتك بالفعل اتعرضت لصدمة كبيرة في بداية حياتها جعلتها بالطبع تفقد الثقة في نفسها أولاً قبل الناس ولكن مع الأسف هي فرغت شحنة غضبها فيك ومش معني إنها فشلت في تجربة وصادفت ناس وحشة في حياتها لم يصونوا العشرة أو الصداقة يبقي كل الناس وحشة وتخليك تشوف الدنيا والناس وتحكم عيهم بنظرتها هي،

أولاً إتعلم إنك لا تحكم علي الناس إلا بأفعالهم وبنظرتك أنت لهم من خلال تجربتك معاهم وبعد أن تتأكد بالفعل أنهم غير جديرين بثقتك،
لا تدع التجربة الفاشلة التي مرت بها والدتك تتحكم في حياتك وفي نظرتك للآخرين لأن الشك هايفشلك ويدمرك بجد لازم تبني علاقاتك مع الآخرين علي أساس الثقة المتبادلة إلي أن يثبت لك العكس ولا مانع من قليل من الحذر في بداية تعاملاتك وليس الشك حتي تحسم أمرك معهم حتي تستطيع أن تواصل حياتك فأنت لن تعيش حياتك كلها في اختبارات وشكوك لكل من حولك، وأرجو منك إذا كنت بالفعل وصلت لحالة الشك المرضي استشارة طبيب نفسي يساعدك علي تخطي هذه المرحلة وفي استعادة ثقتك بنفسك أولاً ومن ثم الثقة بالآخرين
وفي النهاية أتمني إني أكون قدرت أساعدك ورديت علي أسألتك وماخيبتش أملك زي ما كنت شاكك وخالص تحياتي لك يا نور
إيمان حكيم