full screen background image

5 موااااه للعالم من شرم الشيخ …. بقلم / إيمان حكيم

شىء جميل قوى إنك تقول باحبها ، وشىء رائع جداً إنك تتغزل فى حبها ، وحاجة هايلة أخر حاجة ، إن الناس تتفرج عليك ، وإنت بتحبها ، بس الأهم ، والأروع ، والأجمل ، من كل الإفتكاسات دى ، إنك تكون عارف إزاى تحبها ، وإزاى توصل الحب ده صح ، للعالم كله ، و تجبره على إنه يشاركك حبها ، من غيرجُرس ، ولا فضايح ، ولاتحسيس على البطحة ، إللى فى أم رأس حبيبتك دى.

أكيد إنكم سمعتم زيى من إعلام خالتى اللتاتة ، إن الحكومة عَزّلت مؤقتاً ونقلت إجتماعاتها لشرم الشيخ ، لتوجيه ضربة حرة مباشرة للعالم ، إللى بيفترى علينا ، وبيقول إن فى تقصير أمنى ، فى شرم الشيخ ، وحبت تثبتله عملياً ، وعلى عينك يا تاجر، إن الحكومة بذات نفسها ، كلها فى شرم الشيخ ، وبتتفتش نَفر نَفر، وكل وزير ووزيرة ، سايب إيده ، ومسلم نفسه ، كالحمل الوديع ، لرجال الأمن فى المطار، ولسان حاله بيقول ، زى إسماعيل ياسين ، فى إبن حميدو ، فتشنى فتش ياخويا ، وبكدة يكونوا ضربوا عصفورين بحجر، إتفسحوا ، وغيروا جو ببلاش ، وفكوا عن نفسهم شوية ، بعد كارثة الطيارة ، الله مش هما الحكومة؟ وفى نفس الوقت يسدوا الخرم بتاع وزير السياحة ، ويوجهوا رسالة قوية للعالم ، من شرم الشيخ وعلى الهواء مباشرة ، إن مافيش حَدانا أى حاجة تخوف ، و أهلا وسهلا بهم ، وبعملتهم الصعبة ، يبلبطوا فى البحر، ويأخدوا " تان" وينسوا إللى حصل ، دى كانت مجرد زوبعة فى فنجان وراحت لحالها .

و أكيد برضة زيكم زيي ، سمعتم عن مسيرات المثقفين ، والفنانين ، فى شرم الشيخ ، و طبعاً من غير ماقولكم ، عارفين إنهم أكيد غنوا ، تسلم الأيادى ، واكيد أكيد رقصوا ، على بشرة خير، زيها زي أى مسيرة شاركوا فيها ، من أول ما ركبوا عَجل ، مع الريس ، لحد مطاردتهم له فى أمريكا وأوربا ، الشهادة لله هم راشقين فى كل حاجة ، و مش مقصرين ، لا فى رقص ، ولا فى غناء ، ولا فى تصاوير، ولقاءات أمام الكاميرات. 
وعلى طريقة الفنان القديم ، منير مراد ، فى أغنيته الشهيرة جداً ، وإللى كان بيقلد الفنانين المشهورين ، و بيقول فيها ، ماحدددش شاف عبد الوهاب ، ماحدددش شاف محمد فوزى ، وهكذا ….. إسمحولى أنا أسالكم بنفس الطريقة ، ماحدددش شاف الراقصة الإعلامية فيفى عبدة ، وهى بِتثًبت العالم كله ، وبتعمله باى باى ، و 5 مواااااه من شرم الشيخ ، أليس هذا دليل على الأمن ، والآمان ، هناك بعد حادثة الطيارة الروسية ، وإن الجو جميل و السياحة فل الفل ، ولا ينقصنا إلا رؤياهم
.
ماحدددش شاف الراقصة اللولبية صوفينار، إللى إتهمت فى ، قضية إهانة العلم المصرى ، وَهى بتوجب معانا ، وبتقدم وصلة رقص بالبكينى ، من على البلاج ، فى شرم الشيخ ، ولاأجدعها بلطية ، لسة خارجة طازة ، من أعماق البحر الأحمر، أليس هذا دليل ، على إن شرم لسة بخير ، والآمان فيها للركب ، والرقاصة خلصت وصلتها بسلام وآمان ، و أنتم إللى كبرتوا الموضوع ، وحادثة الطيارة كان مجرد خضة ، وراحت لحالها.

طيب ماحدددش شاف النجم الزعيم عادل إمام ، وهو بيحرج مراسل قناة المحور، لما طلب منه يقول رسالة لدعم السياحة ، ورد عليه الفنان بكل غتاتة " إزيك ياحبيى" ، ماقلنا الرسالة إمبارح ، وسابه ومشى ، أصلها من وجهة نظره ، مش شغلانة يعنى ولا هى بقششة ، إنه يقول رسالتين فى حب مصر ، يومين ورا بعض ، وعلى رأيه دى عالم صااايعة يابا

طيب ماحدددش شاف بقى كل المسؤلين ، والمثقفين و الفنانين دول ، وإللى بيقبضوا عشرات الملايين ، فى العمل الواحد ، حد فيهم إتبرع ولو بجنيه لمصر حبيبته وأمه ، بدل اللف والدوران ، فى الشوارع ، والرقص بالأعلام ببلاش فى حب مصر. 
مش لو كل واحد من هؤلاء الكبار، إتبرع بربع أجره ، من عمل واحد لصالح البلد ولا لصالح العاملين ، فى شرم الشيخ ، إللى بيوتهم مهددة بالخراب ، نتيجة وقف الحال ، كان بقى هو ده الحب إللى بجد ، وهى دى الطريقة إللى يحبها بها ، من غير مسيرات ، ولا غناء ، ولا رقص ، ولا تصاوير، ولا التنطيط والسفر، وراء الرئيس فى كل بلد شوية ، مش كدة كان العالم هايصدقهم أكتر، ويحترمهم أكتر ، وكنا كلنا جميعاً ومن كل قلوبنا ، قولنا لهم شكراً ، فنانى ومبدعى مصر، و5 موااااه بجد من كل مصرى لكم ، و تسلم الأيادى ، و تسلم بجد ، يا كل مبدع ، ويا كل فنان ، وياكل مسؤول فى بلادى .

 

اجتماع مجلس الوزراء فى شرم الشيخ

1448112148f5mh6h4z63d

جانب من مسيرة الفنانين فى شرم الشيخ

1448112151yq006vj5ez0

1448112154yytpqhu0q4f

14481121575syrpepxwwg

1448112160obqtfd0fjwp




  • magdy ibrahimalhelw@hotmail.co

    مش بس خمسة موووواة لأ عشرة موووووووواة بس كان نفسى زيك الاقى الفنانين والأعلاميين وكل اللى مرتباتهم مرتاحة يكونوا ايجابيين اكتر من كدة وياريت نفتكر السيدة ام كلثوم زمان عملت اية وكذلك رئيس الجمهورية اللى تناذل عن جزئ من ميراثة العائلى وايضآ جذئ من راتبة الشهرى لصالح مصرنا الغالية # هو دة الحب الحقيقى